شروط الاستخدام

Vooksio بيرد تلقائيًا على رسايل إنستجرام وماسنجر بتاعة المحل، بالعامية المصرية، ومن الكتالوج اللي المحل بيدّيه لنا. لما البوت ما يلاقيش الإجابة في الكتالوج أو الزبون يطلب حد، بيحوّل المحادثة لفريق المحل.

باستخدامك للخدمة أو تسجيلك في الموقع، إنت موافق على الشروط دي وعلى سياسة الخصوصية.

• التسجيل في الموقع طلب تواصل، مش اشتراك. الاشتراك بيبدأ بعد ما نتفق ونشغّل البوت على حساب المحل
• لازم تكون صاحب الحساب أو مفوّض بإدارته
• الربط بيتم عن طريق ManyChat، وده اشتراك منفصل على حساب المحل وبيتدفع لـ ManyChat مباشرةً
• المحل بيفضل مالك حساباته وصلاحياتها، ويقدر يفصل الربط في أي وقت

البوت بيرد من المعلومات اللي المحل بيدّيها: المنتجات، الأسعار، المقاسات، المتاح، وسياسات الشحن والاستبدال. المحل مسؤول إن المعلومات دي صح ومحدّثة، وإنه يبلغنا أو يرفع الكتالوج الجديد لما حاجة تتغير.

المحل مسؤول عن منتجاته وعروضه وتعامله مع زباينه، وعن الالتزام بقوانين حماية المستهلك وبسياسات Meta.

الردود بيكتبها نموذج ذكاء اصطناعي. بنجرّبه مع المحل على أسئلة حقيقية قبل التشغيل، وبنقيّده بالكتالوج، لكن ممكن يغلط أو يفهم سؤال غلط. علشان كده:

• لو المحل لاحظ رد غلط يبلغنا علشان نصلّحه، ونقدر نطلّع له سجل المحادثات عند الطلب
• أي التزام تجاه الزبون (سعر، عرض، ميعاد توصيل) المرجع فيه هو المحل، مش رد البوت
• الطلبات والدفع بيتموا بين المحل والزبون. Vooksio مش طرف في البيع

• الاشتراك شهري حسب الباقة المعلنة في صفحة الأسعار وقت الاشتراك، وبيتدفع مقدّم
• رسوم الإعداد بتتدفع مرة واحدة
• الردود اللي بتزيد عن الباقة بتتحاسب بالسعر المعلن، وبنبلغ المحل قبل ما يوصل للحد
• الدفع بإنستاباي أو فودافون كاش أو تحويل بنكي
• لو غيّرنا الأسعار، بنبلغ المحلات المشتركة قبلها، والتغيير بيتطبّق من أول شهر جديد

مفيش عقد ولا مدة التزام. المحل يقدر يوقف الاشتراك في أي وقت بإنه يبلغنا، والخدمة بتفضل شغالة لآخر الشهر المدفوع.

من حقنا نوقف الخدمة عن محل بيستخدمها في حاجة مخالفة للقانون أو لسياسات Meta، أو متأخر في الدفع، بعد ما نبلغه.

بعد الإلغاء، المحل يقدر يطلب حذف الكتالوج وسجل المحادثات.

ممنوع استخدام الخدمة في:

• بيع منتجات أو خدمات ممنوعة قانونًا أو مخالفة لسياسات Meta
• إرسال رسايل مزعجة أو مضللة
• محاولة اختراق الخدمة أو تعطيلها أو استخدام الديمو بشكل آلي

الخدمة معتمدة على مزوّدين خارجيين (Meta وManyChat ومزوّد الذكاء الاصطناعي والاستضافة). بنشتغل على إنها تفضل شغالة طول الوقت، لكن مش بنضمن إنها مش هتقف أبدًا. لو البوت اتأخر في الرد، المحادثة بتتحوّل لفريق المحل بدل ما الزبون يستنى.

الخدمة بتتقدّم «كما هي». في حدود ما يسمح به القانون، مسؤولية Vooksio عن أي ضرر ناتج عن الخدمة ما تزيدش عن اللي المحل دفعه في آخر تلات شهور، ومش بنتحمّل الخسائر غير المباشرة زي فرص بيع ضاعت.

ممكن نحدّث الشروط دي. هنغيّر التاريخ اللي فوق ونبلغ المحلات المشتركة قبل ما أي تغيير مهم يتطبّق.

الشروط دي بتخضع لقوانين جمهورية مصر العربية.

لأي سؤال عن الشروط أو الاشتراك:

ابعتلنا من نفس القناة اللي بنتواصل معاك منها (واتساب أو رسايل حساب Vooksio)، وهنرد عليك خلال أيام العمل.